महिलांच्या गळ्यातील मंगळसूत्र चोरणाऱ्या अट्टल चोराला अटक; ८ गुन्हे उघड, १० लाखांचा मुद्देमाल जप्त

ताज्या घडामोडी मोबाइल वर मिळवा.फोटो वर क्लिक करा

पुणे ग्रामीण पोलिसांची मोठी कारवाई: स्थानिक गुन्हे शाखा आणि रांजणगाव पोलीस स्टेशनची संयुक्त कामगिरी

पुणे, ११ जून २०२५: पाण्याची बाटली विकत घेण्याचा बहाणा करून महिलांच्या गळ्यातील मंगळसूत्र जबरदस्तीने चोरणाऱ्या एका अट्टल चोराला पुणे ग्रामीण पोलिसांनी अटक केली आहे. या कारवाईत पोलिसांनी त्याच्याकडून जबरी चोरीचे ८ गुन्हे उघडकीस आणले असून, १० तोळे २०० मिली ग्रॅम वजनाचे सोन्याचे दागिने आणि एक मोटरसायकल असा एकूण १०,१०,०००/- रुपये किमतीचा मुद्देमाल हस्तगत केला आहे. स्थानिक गुन्हे शाखा आणि रांजणगाव पोलीस स्टेशनने ही संयुक्त कारवाई केली आहे.

गुन्ह्याची पार्श्वभूमी:

रांजणगाव एमआयडीसी पोलीस स्टेशनमध्ये २५/०३/२०२५ रोजी गुन्हा रजि नंबर ९४/२०२५ बी एन एस ३०९ (४) अंतर्गत गुन्हा दाखल करण्यात आला होता. फिर्यादी श्रीमती वंदना रोहिदास शेटे (वय ३३, रा. पिंपरी दुमाला, ता. शिरूर, जि. पुणे) या रांजणगाव गणपती चौक येथील धनगरवाडा स्नॅक्स सेंटरमध्ये उभ्या असताना, दोन अनोळखी इसम मोटरसायकलवरून दुकानासमोर आले. त्यापैकी एक इसम दुकानात आला आणि त्याने पाण्याची बाटली मागितली व ५० रुपये दिले. फिर्यादी बाटलीचे पैसे घेऊन उर्वरित रक्कम परत देण्यासाठी पैशांच्या ड्रॉवरमध्ये वाकल्या असता, त्या अनोळखी इसमाने त्यांच्या गळ्यातील ११ ग्रॅम वजनाचे सोन्याचे मिनी गंठण जबरदस्तीने ओढून घेतले आणि बाहेर उभ्या असलेल्या साथीदारासह स्पोर्ट्स बाईकवरून पळून गेला. या घटनेबाबत फिर्यादीने रांजणगाव पोलीस स्टेशनमध्ये तक्रार दिली होती.

तपास आणि आरोपीची ओळख:

या गुन्ह्याचा तपास स्थानिक गुन्हे शाखा आणि रांजणगाव पोलीस स्टेशनच्या तपास पथकामार्फत सुरू होता. तपासादरम्यान, घटनास्थळावरील सीसीटीव्ही फुटेज तपासले असता, चोरट्यांनी गुन्हा करताना वापरलेली स्पोर्ट्स बाईक टीव्हीएस अपाचे कंपनीची असल्याचे निष्पन्न झाले. दरम्यान, शिरूर, शिक्रापूर, पिंपरी चिंचवड आयुक्तालयातील चाकण, आळंदी पोलीस स्टेशन तसेच अहिल्यानगर जिल्ह्यातील कर्जत पोलीस स्टेशन येथेही अशाच प्रकारचे गुन्हे घडले होते. या आरोपींचा शोध घेताना, रेकॉर्डवरील गुन्हेगार आणि जेलमधून सुटलेले गुन्हेगार यांची तपासणी करण्यात आली. सर्व घटनास्थळांवरील सीसीटीव्ही फुटेज एकत्र करून तपासणी करण्यात आली आणि आरोपींच्या येण्या-जाण्याचा मार्ग निश्चित करण्यात आला. पोलिसांनी गेल्या दहा दिवसांपासून संयुक्तपणे सापळे लावले होते, परंतु आरोपी वारंवार पोलिसांना गुंगारा देत होते. घटनास्थळापासून ते बीड जिल्ह्यापर्यंत सुमारे ३०० ते ३५० कॅमेरे तपासण्यात आले आणि सर्व घटनास्थळांवरील तांत्रिक विश्लेषण करण्यात आले.

तांत्रिक विश्लेषण आणि बातमीदारांकडून मिळालेल्या माहितीच्या आधारे, मारुती ऊर्फ गोविंद रामनाथ आंधळे (वय ३८, रा. लिंबोडी, पो. देवीनिमगाव, ता. आष्टी, जि. बीड) याने त्याचा साथीदार शरद बापू पवार (रा. लोणी सय्यदमीर, ता. आष्टी, जि. बीड) याच्यासह हे गुन्हे केल्याचे निष्पन्न झाले.

आरोपीला अटक आणि मुद्देमाल जप्त:

पोलीस अंमलदार उमेश कुतवळ यांना आरोपी मारुती रामनाथ आंधळे हा अहिल्यानगर ते शिरूर त्याच्या स्पोर्ट्स बाईकवरून येणार असल्याची खात्रीशीर माहिती मिळाली. या माहितीनुसार, स्थानिक गुन्हे शाखा आणि रांजणगाव पोलीस स्टेशनच्या कर्मचाऱ्यांनी संयुक्तपणे शिरूर हद्दीत सतरा कमान पुलाच्या अलीकडे सापळा लावला आणि आरोपीला त्याच्या टीव्हीएस कंपनीच्या अपाचे आर १६० मॉडेलच्या मोटार सायकलसह ताब्यात घेतले. त्याच्याकडे सखोल तपास केला असता, त्याने हा गुन्हा त्याचा मित्र शरद बापू पवार याच्यासह केल्याचे सांगितले. तसेच, त्यांनी शिरूर, शिक्रापूर, पिंपरी चिंचवड आयुक्तालयातील चाकण, आळंदी पोलीस स्टेशन आणि अहिल्यानगर जिल्ह्यातील कर्जत पोलीस स्टेशन हद्दीत अशा प्रकारचे गुन्हे केल्याचे तपासात निष्पन्न झाले आहे.

आरोपींकडून गुन्ह्यात वापरलेली टीव्हीएस अपाचे मोटार सायकल आणि एकूण ८ गुन्ह्यांतील १० तोळे २०० मिली ग्रॅम वजनाचे सोन्याचे दागिने असा एकूण किंमत १०,१०,०००/- रुपयांचा मुद्देमाल हस्तगत करण्यात आला आहे. नमूद आरोपी सध्या रांजणगाव एमआयडीसी पोलीस स्टेशनच्या पोलीस कस्टडीमध्ये आहे.

आरोपीकडून उघडकीस आलेले गुन्हे:

| अ. क्र. | पोलीस स्टेशन | गुन्हा रजि नंबर व कलम |

|—|—|—|

| १ | रांजणगाव | ९४/२०२५ बी एन एस ३०९(४) |

| २ | रांजणगाव | १८३/२०२५ बी एन एस ३०९ (४) |

| ३ | शिरूर | ३८१/२०२५ बी एन एस ३०९ (४) |

| ४ | शिक्रापूर | १०५४/२०२४ बी एन एस ३०९ (४) |

| ५ | आळंदी | १४४/२०२५ बी एन एस ३०९ (४) |

| ६ | चाकण | ३७५/२०२५ बी एन एस ३०९ (४) |

| ७ | चाकण | २४३/२०२५ बी एन एस ३०९ (४) |

| ८ | कर्जत | ३४०/२०२५ बी एन एस ३०९ (४) |

कामगिरी करणारे अधिकारी:

सदरची कामगिरी मा. पोलीस अधीक्षक श्री. संदीप सिंह गिल्ल, मा. अपर पोलीस अधीक्षक श्री. रमेश चोपडे (पुणे विभाग), उपविभागीय पोलीस अधिकारी प्रशांत ढोले यांच्या मार्गदर्शनाखाली, स्थानिक गुन्हे शाखेचे पोलीस निरीक्षक अविनाश शिळीमकर, रांजणगाव पोलीस स्टेशनचे पोलीस निरीक्षक महादेव वाघमोडे, स्थानिक गुन्हे शाखेचे सपोनि दत्ताजीराव मोहिते, सपोनि कुलदीप संकपाळ, पोलीस हवालदार तुषार पंदारे, पोहवा जनार्दन शेळके, पोहवा राजू मोमीन, पोहवा संजू जाधव, पोहवा/योगेश नागरगोजे, पोलीस अंमलदार सागर धुमाळ, रांजणगाव पोलीस स्टेशनचे पोसई थोरात, सहा. फौजदार दत्ता शिंदे, पोलीस अंमलदार उमेश कुतवळ, पोलीस अंमलदार योगेश गुंड, पोलीस अंमलदार संतोष साळुंखे, पोलीस अंमलदार खरबस, साळवे यांनी यशस्वीरित्या पार पाडली.