शिरूर नगरपरिषदेच्या जागेवर बेकायदेशीर अतिक्रमण; प्रशासनाचा हलगर्जीपणा उघड
निर्भय न्यूज लाईव्ह:वृत्तसेवा
शिरूर नगरपरिषदेच्या जागेवर बेकायदेशीर अतिक्रमण; प्रशासनाचा हलगर्जीपणा उघड
शिरूर: शिरूर शहरातील जुन्या मार्केट यार्डसमोरील त्रिकोणी जागेवर बेकायदेशीर अतिक्रमण झाल्याचे धक्कादायक वास्तव समोर आले आहे. शिरूर नगरपरिषदेने या जागेसाठी सिमेंट कंपाउंड उभारले असतानाही, काही लोकांनी या ठिकाणी लोखंडी कंटेनर, मशिनरी, लोखंडी साहित्य ठेवले आहे. एवढेच नव्हे, तर काही लोकांनी या जागेत वास्तव्यास देखील सुरुवात केली आहे.
प्रशासनावर प्रश्नचिन्ह:
* नगरपरिषदेच्या स्पष्ट आदेशानंतरही अतिक्रमण कसे सुरू आहे?
* कोणत्या अधिकाऱ्याने हे दुर्लक्ष केले?
* त्या जागेचा महसूल कोण वसूल करत आहे?
* परिसरात सीसीटीव्ही कॅमेरे असूनही त्याचा उपयोग का केला जात नाही?
या संपूर्ण प्रकाराबाबत अनेक शंका उपस्थित होत आहेत.
मनसेचा इशारा:
मनसेचे जिल्हा उपाध्यक्ष महिबुब सय्यद, शिरूर प्रवासी संघाचे अध्यक्ष अनिल बांडे आणि मनसेचे तालुका संघटक अविनाश घोगरे यांनी या मुद्द्यावर तीव्र नाराजी व्यक्त केली आहे. “शासकीय जागेचा बेकायदेशीर वापर सुरू असताना नगरपरिषद आणि प्रशासन झोपले आहे का?” असा सवाल करत त्यांनी तात्काळ कारवाईची मागणी केली आहे.
नागरिकांमध्येही मोठा संताप असून, नगरपरिषदेने तातडीने संबंधितांवर फौजदारी गुन्हे दाखल करून अतिक्रमण हटवावे, अन्यथा आंदोलन छेडले जाईल, असा इशारा मनसेच्या वतीने देण्यात आला आहे.
प्रशासनाची भूमिका:
या संपूर्ण प्रकरणावर शिरूर नगरपरिषदेच्या प्रशासनाने अद्याप कोणतीही अधिकृत प्रतिक्रिया दिलेली नाही. मात्र, नागरिकांच्या वाढत्या दबावामुळे प्रशासन लवकरच यावर कारवाई करेल, अशी शक्यता वर्तवली जात आहे.
