आंतरजिल्हा दरोडेखोरांची टोळी गजाआड, पुणे ग्रामीण पोलिसांची मोठी कारवाई; ६ गुन्हे उघडकीस

ताज्या घडामोडी मोबाइल वर मिळवा.फोटो वर क्लिक करा

पुणे ग्रामीण पोलिसांनी आंतरजिल्हा दरोडेखोरांच्या एका टोळीचा पर्दाफाश करत, या टोळीच्या म्होरक्यासह दोन सदस्यांना अटक केली आहे. या कारवाईमुळे दरोड्याचे दोन आणि जबरी चोरी, घरफोडी व चोरीचे असे एकूण सहा गुन्हे उघडकीस आले आहेत. स्थानिक गुन्हे शाखा, पुणे ग्रामीण आणि शिरूर पोलिसांनी संयुक्तपणे ही कामगिरी केली.

गुन्ह्याची सविस्तर माहिती:

दिनांक ५ जुलै २०२५ रोजी रात्री १ वाजण्याच्या सुमारास, शिरूर तालुक्यातील आंबळे येथील कल्पना प्रताप निंबाळकर (वय ६०) यांच्या घरी पाच ते सहा अनोळखी चोरट्यांनी दरोडा टाकला. चोरट्यांनी घराचा दरवाजा लाथा मारून तोडला आणि घरात प्रवेश केला. त्यानंतर कल्पना निंबाळकर आणि त्यांच्या नातेवाईक रत्नाबाई शितोळे यांना दांडक्याने मारहाण करून त्यांचे मंगळसूत्र, कर्णफुले आणि चांदीची जोडवी असा एकूण १,६४,०००/- रुपये किमतीचा सोन्या-चांदीचा मुद्देमाल लुटून नेला. या घटनेप्रकरणी शिरूर पोलीस ठाण्यात भा.न्या.सं. २०२३ कलम ३१०, ३११ नुसार गुन्हा (गु.र.नं. ४८७/२०२५) दाखल करण्यात आला होता.

पोलिसांची तपासणी आणि आरोपींना अटक:

घटनेचे गांभीर्य लक्षात घेऊन, पुणे ग्रामीणचे पोलीस अधीक्षक संदीप सिंह गिल्ल यांनी तात्काळ गुन्हा उघडकीस आणण्याचे निर्देश दिले. स्थानिक गुन्हे शाखेच्या पथकाने समांतर तपास सुरू केला. घटनास्थळाची पाहणी आणि सीसीटीव्ही फुटेज तपासले असता, चोरट्यांनी गुन्ह्यासाठी सिल्व्हर रंगाच्या तवेरा चारचाकी वाहनाचा वापर केल्याचे निष्पन्न झाले. सुमारे १५० किलोमीटरपर्यंतच्या सीसीटीव्ही फुटेजच्या तपासणीनंतर, संशयित वाहन पाथर्डी परिसरातून पुढे गेल्याचे दिसून आले.

दरम्यान, गोपनीय बातमीदारांकडून माहिती मिळाली की, गुन्ह्यात वापरलेली तवेरा गाडी रेकॉर्डवरील गुन्हेगार संजय तुकाराम गायकवाड (रा. भोकरदन, जालना) वापरत आहे आणि त्यानेच साथीदारांच्या मदतीने हा गुन्हा केला आहे. या माहितीच्या आधारे, ६ जुलै २०२५ रोजी संजय तुकाराम गायकवाड (वय ४५, रा. धनगरवाडी, भोकरदन, जि. जालना) आणि सागर सुरेश शिंदे (वय १९, रा. संत तुकाराम नगर, मंठा, ता. मंठा, जि. जालना) यांना नगर-पुणे रोडवर ताब्यात घेण्यात आले. चौकशीदरम्यान, त्यांनी गुन्ह्याची कबुली दिली आणि त्यांच्यासोबत इतर पाच साथीदार असल्याचे सांगितले.

उघडकीस आलेले गुन्हे:

या टोळीने खालीलप्रमाणे एकूण ६ गुन्हे केल्याचे निष्पन्न झाले आहे:

 * शिरूर, पुणे ग्रामीण: गु.र.नं. ४८७/२०२५ BNS ३१०, ३११

 * शेवगाव, अहिल्यानगर: गु.र.नं. ५९६/२०२५ BNS ३१०(२)

 * पारनेर, अहिल्यानगर: गु.र.नं. ५३३/२०२५ BNS ३०९ (५), ३३३ (४)

 * अकोला जुनेशहर, अकोला: गु.र.नं. ४३१/२०२५ BNS ३३१ (४), ३०५(अ)

 * अकोला जुनेशहर, अकोला: गु.र.नं. ४४६/२०२५ BNS ३०५

 * मालेगाव, वाशिम: गु.र.नं. ३०२/२०२५ BNS ३३१ (४), ३०५ (अ)

गुन्हेगारी टोळीची पार्श्वभूमी:

पुणे ग्रामीण पोलिसांनी ताब्यात घेतलेली ही टोळी सराईत दरोडेखोरांची असून, विविध जिल्ह्यांतील पोलीस पथके त्यांच्या मागावर होती. या टोळीवर विविध जिल्ह्यांमध्ये दरोडा आणि जबरी चोरीचे गुन्हे दाखल आहेत. ही टोळी गुन्हा करताना महिलांना लक्ष्य करून त्यांना दांडक्याने मारहाण करून अंगावरील दागिने जबरदस्तीने हिसकावून घेते. या टोळीवर बीड जिल्ह्यांत मोक्का कायद्यांतर्गत कारवाई झालेली आहे.

मुख्य आरोपी संजय तुकाराम गायकवाड हा सराईत गुन्हेगार असून, त्याच्यावर यापूर्वी जालना, छत्रपती संभाजी नगर, नाशिक, बीड, जळगाव, परभणी, लातूर या जिल्ह्यांमध्ये दरोडा, जबरी चोरी, घरफोडी आणि चोरीचे असे एकूण १३ गुन्हे दाखल आहेत. तो या गुन्हेगारी टोळीचा प्रमुख असल्याने त्याच्यावर मोक्का कायद्यांतर्गत कारवाई करण्यात आली होती आणि तो पाच वर्षे कारागृहात होता. मागील सहा महिन्यांपूर्वीच तो जामिनावर बाहेर आला होता.

पोलिसांचे पथक:

सदरची कामगिरी पुणे ग्रामीणचे पोलीस अधीक्षक श्री. संदीप सिंह गिल्ल, अपर पोलीस अधीक्षक श्री. रमेश चोपडे (पुणे विभाग) आणि उपविभागीय पोलीस अधिकारी प्रशांत ढोले (शिरूर विभाग) यांच्या मार्गदर्शनाखाली करण्यात आली. यामध्ये स्थानिक गुन्हे शाखेचे पोलीस निरीक्षक अविनाश शिळीमकर, शिरूर पोलीस ठाण्याचे पोलीस निरीक्षक संदेश केंजळे, स्थानिक गुन्हे शाखेचे सपोनि कुलदीप संकपाळ, पोलीस अंमलदार तुषार पंदारे, जनार्दन शेळके, संजू जाधव, राजू मोमीण, अतुल डेरे, सागर धुमाळ, तसेच शिरूर पोलीस ठाण्याचे अंमलदार नितेश थोरात, निखील रावडे, निरज पिसाळ, रविंद्र आव्हाड आणि अजय पाटील यांचा समावेश होता. पुढील तपास शिरूर पोलीस ठाणे आणि स्थानिक गुन्हे शाखेचे पथक करत आहे.