पुणे ग्रामीण पोलिसांची मोठी कारवाई: शिरूर तालुक्यातील कारेगाव मध्ये चार बांगलादेशी घुसखोर जेरबंद!

ताज्या घडामोडी मोबाइल वर मिळवा.फोटो वर क्लिक करा

पुणे ग्रामीण पोलिसांच्या दहशतवादविरोधी शाखेने (ATS) रांजणगाव पोलिसांच्या मदतीने शिरूर तालुक्यातील कारेगाव येथे मोठी कारवाई करत चार बांगलादेशी नागरिकांना अटक केली आहे. हे सर्वजण गेल्या दोन वर्षांपासून बनावट आधार कार्ड वापरून बेकायदेशीररित्या भारतात वास्तव्य करत होते.

घडलेली घटना:

मिळालेल्या माहितीनुसार, पुणे ग्रामीण दहशतवादविरोधी शाखेचे पोलीस कॉन्स्टेबल मोसिन बशीर शेख (बक्कल नंबर 2968) यांना गोपनीय माहिती मिळाली होती की, शिरूर तालुक्यातील कारेगाव येथे काही बांगलादेशी नागरिक बेकायदेशीररित्या वास्तव्य करत आहेत. या माहितीच्या आधारे, दहशतवादविरोधी शाखा आणि रांजणगाव पोलिसांनी संयुक्तपणे ११ जुलै २०२५ रोजी सायंकाळी ६:३० ते रात्री ११:२० दरम्यान कारेगाव येथे छापा टाकला.

या छाप्यात कमरोल रमजान शेख (वय ३२), अकलस मजेद शेख (वय ३९), मोहम्मद अब्दुल्ला मलिक (वय ३५), आणि जाहिद अबूबकर शेख (वय ३०) या चार बांगलादेशी नागरिकांना ताब्यात घेण्यात आले. हे सर्वजण बांगलादेशातील वेगवेगळ्या जिल्ह्यांतील रहिवासी असून, त्यांच्याकडे भारतात प्रवेश करण्यासाठी कोणतीही वैध कागदपत्रे किंवा परवाने नव्हते. त्यांनी बेकायदेशीर मार्गाने भारतीय सरहद्दीत प्रवेश केला होता आणि बनावट भारतीय आधार कार्ड धारण करून कारेगाव, शिरूर येथे गेल्या दोन वर्षांपासून राहत असल्याचे निष्पन्न झाले आहे.

नोंदवलेला गुन्हा:

या प्रकरणी रांजणगाव पोलीस ठाण्यात गु.र.नं. २२८/२०२५ अन्वये भारतीय न्याय संहिता (भा.न्या.सं.) कलम ३३६(२)(३), ३३८, ३४०(२), तसेच पासपोर्ट अधिनियम कलम ३, ६, पारपत्र अधिनियम १९५० कलम ३(अ) आणि परकीय नागरिक आदेश १९४८ कलम १४ नुसार गुन्हा दाखल करण्यात आला आहे. फिर्यादी म्हणून पो. कॉ. मोसिन बशीर शेख यांनी तक्रार दिली आहे.

अटकेची आणि पुढील कारवाईची माहिती

चारही आरोपींना १२ जुलै २०२५ रोजी सकाळी ५:०० वाजता अटक करण्यात आली असून, त्यांना आज न्यायालयात हजर केले असता, माननीय न्यायालयाने त्यांना पोलीस कोठडी सुनावली आहे. पुढील तपास पोलीस उपनिरीक्षक तिडके करत आहेत.

कारवाई करणारे पथक:

सदरची कारवाई पुणे ग्रामीण पोलीस अधीक्षक मा. श्री. संदीपसिंह गिल साहेब, अपर पोलीस अधीक्षक मा. श्री. रमेश चोपडे साहेब, आणि शिरूर उपविभागीय पोलीस अधिकारी मा. श्री. प्रशांत ढोले यांच्या मार्गदर्शनाखाली करण्यात आली. यामध्ये रांजणगाव पोलीस ठाण्याचे पोलीस निरीक्षक श्री. महादेव वाघमोडे आणि दहशतवादविरोधी शाखेचे सहाय्यक पोलीस निरीक्षक श्री. प्रकाश पवार यांच्या नेतृत्वाखालील पथकाने मोलाची भूमिका बजावली. या पथकात PSI अविनाश थोरात, Asi विशाल गव्हाणे, Asi दत्तात्रय शिंदे, HC विशाल भोरडे, रवींद्र जाधव, पोलीस कॉन्स्टेबल मोसिन शेख, ओमकार शिंदे, योगेश गुंड, संतोष साळुंखे, आकाश सवाने यांचा समावेश होता.

ही कारवाई पुणे ग्रामीण पोलिसांच्या सतर्कतेचे आणि प्रभावी गुप्तचर यंत्रणेचे उत्तम उदाहरण आहे, ज्याद्वारे देशाच्या सुरक्षेला धोका निर्माण करणाऱ्या बेकायदेशीर घुसखोरांना वेळीच रोखण्यात आले आहे.